၂၀၁၉ ခုနှစ် မေလအတွက် ထူးခြားမည့် ဖြစ်စဉ်များ

၂၀၁၉ ခုနှစ် မေလအတွက် ထူးခြားမည့် ဖြစ်စဉ်များ

အာကာသနှင့် ပတ်သက်ပြီး.. လာမယ့် ၂၀၁၉ ခုနှစ် မေလအတွင်းမှာ ထူးခြားမယ့် ဖြစ်စဉ်အချို့ကို အာကာသနှင့်စကြဝဠာ စာဖတ်ပရိတ်သတ်များအတွက် ရေးသားတင်ဆက်ပေးလိုက်ပါတယ်..။

လက်ရှိ လဆန်းပိုင်းမှာ အထူးရေပန်းစား သတိပြုသင့်တာကတော့ စူပါ ဆိုင်ကလုံးမုန်တိုင်းကြီး ဖာနီ (Fani) ဖြစ်ပါတယ်။ ပြင်းထန်တဲ့ လေဖိအားနည်းရပ်ဝန်းတစ်ခုအတွင်းသို့ ကြီးမားတဲ့ လေစိုင်များ လှည့်ပတ်စီးဝင်တိုက်ခတ်ခြင်းမှ “လေမုန်တိုင်း” များ ဖြစ်လာကြပါတယ်။ “အပူပိုင်း ဆိုင်ကလုံး” ဆိုတာကတော့ အိန္ဒိယသမုဒ္ဒရာနဲ့ ပစိဖိတ် အနောက်တောင်ဒေသတွေမှာ ဖြစ်တဲ့ မုန်တိုင်းများကို အမည်ပေးထားခြင်းဖြစ်ပါတယ်။ အီကွေတာရဲ့ မြောက်ဘက်ခြမ်းမှာဖြစ်တဲ့ မုန်တိုင်းများဟာ နာရီလက်တံ ပြောင်းပြန်လည်ပတ်ကြပါတယ်။

(အတ္တလန်တစ် နဲ့ ပစိဖိတ် မြောက်ပိုင်းမှာ တိုက်ခတ်တဲ့ မုန်တိုင်းများကို “ဟာရီကိန်း” လို့ခေါ်ပါတယ်။ ကာရေဘီယံဒေသရဲ့ နတ်ဆိုး “ဟာရီကန်” ရဲ့ အမည်ကို ယူထားတာပါ။ ပစိဖိတ် အနောက်မြောက်ပိုင်းဒေသမှာဖြစ်တဲ့ မုန်တိုင်းများကိုတော့ “တိုင်ဖွန်း” မုန်တိုင်းများလို့ ခေါ်ကြပါတယ်။ )

မေလ (၅) ရက်နေ့ဟာ နိုင်ငံတကာ အာကာသယာဉ်မှူးများနေ့ဖြစ်ပါတယ်။ အဲ့ဒီ့နေ့ည သန်းခေါင်ယံမှာတော့ အရှေ့ဘက်ကောင်းကင်ကနေ ကြယ်များကျဆင်းခြင်း (ကြယ်ကြွေခြင်း) ဖြစ်စဉ်ကို ကုမ်ရာသီ ကြယ်တာရာများအနီးမှာ ရှာတွေ့နိုင်ပါတယ်။ ဒါပေမယ့်လည်း အရှေ့ဘက်မိုးကုတ်စက်ဝိုင်းနဲ့ သိပ်နီးတဲ့ (၂၆ ဒီဂရီအမြင့်) လောက်မှာဖြစ်မှာမို့ သိသာလွန်းခြင်းတော့ မရှိလောက်ပါ။

မေလ (၁၈) ရက်နေ့မှာပြည့်မယ့် ကဆုန်လပြည့် ကိုတော့ အပြာရောင်လ (Blue Moon) လို့ အမည်ပေးထားပါတယ်။ ရာသီတစ်ခုအတွင်းမှာ စတုထ္ထမြောက်လပြည့်ဖြစ်ခြင်းကို အပြာရောင်လ လို့ တင်စားခေါ်ဆိုကြပါတယ်။ ဂျူပီတာဂြိုဟ်ကြီးကလည်း ပတ်လမ်းကြောင်းမှာ ကမ္ဘာနဲ့ ပြန်နီးလာပြီမို့ ထင်ထင်ရှားရှားနဲ့ တညလုံးနီးပါး မြင်တွေ့ရတော့မှာပါ။ သောကြာဂြိုဟ်လေးကတော့ နေရဲ့အနားရောက်ရှိနေလို့ ယခုရက်ပိုင်း (အာရုံတက်ခါနီး အချိန်မှလွဲလို့) မြင်တွေ့ရဖို့ခက်နေပါတယ်။

အခုရက်ပိုင်း အလုပ်တွေမအားလပ်လို့ ဆောင်းပါးလေးတွေ သိပ်မတင်ဖြစ်ပါ။ အချိန်ရလျှင် ရသလို အာကာသ သတင်းဆောင်းပါးလေးတွေ ရေးသားပါဦးမည်။

အာကာသနှင့် စကြဝဠာရဲ့ စာဖတ်ပရိတ်သတ်များအားလုံး ကျန်းမာပျော်ရွှင်တဲ့ လူမှုဘဝများ ပိုင်ဆိုင်နိုင်ကြပါစေ…။

အနာဂတ်ပညာရေးအတွက်..

သန့်ဦး (အာကာသနှင့် စကြဝဠာ သင်ထောက်ကူ)

အာကာသ နှင့် စကြ၀ဠာ